တိုယိုတာကားကုမ္ပဏီနှင့် မြန်မာနိုင်ငံဘောလုံးအဖွဲ့ချုပ်တို့ ဒေါ်လာခုနစ်သိန်းတန် စပွန်ဆာစာချုပ်,ချုပ်ဆို

ကမ္ဘာကျော် ကားကုမ္ပဏီတစ်ခုဖြစ်သည့် တိုယိုတာကုမ္ပဏီနှင့် မြန်မာနိုင်ငံဘောလုံးအဖွဲ့ချုပ်တို့ ဒေါ်လာ ခုနှစ်သိန်းတန်ကြေးရှိစပွန်ဆာစာချုပ် ချုပ်ဆိုခဲ့သည်ဟု မြန်မာနိုင်ငံဘောလုံးအဖွဲ့ချုပ် မီဒီယာဒါရိုက်တာ ဦးစိုးမိုးကျော်က မဇ္ဈိမသို့ အတည်ပြု ပြောကြားသည်။

ဂျပန်ကားကုမ္ပဏီတိုယိုတာနှင့် ဘောလုံးအဖွဲ့ချုပ်တို့ ချုပ်ဆိုခဲ့သော စာချုပ်သက်တမ်းမှာ နှစ်,နှစ်ဖြစ်ပြီး မြန်မာနေရှင်နယ်လိဂ်ပြိုင်ပွဲအတွက် ဒေါ်လာသုံးသိန်း၊ မြန်မာ့အမျိုးသမီးဘောလုံးလောက တိုးတက်ဖွံ့ ဖြိုးရေးအတွက် ဒေါ်လာတစ်သိန်း၊ မြန်မာနိုင်ငံ ဘောလုံးဖွံ့ဖြိုးတိုးတက်ရေး လုပ်ငန်းများအတွက် ဒေါ် လာသုံးသိန်း ပံ့ပိုးကူညီမည် ဖြစ်သည်။ “တိုယိုတာက ဘောလုံးအဖွဲ့ချုပ်ကို စပွန်ဆာပေးတာပါ။ နှစ်,နှစ် စာချုပ်,ချုပ်ထားပါတယ်။ အဓိက ကတော့ မြန်မာနေရှင်နယ်လိဂ်ကို စပွန်ဆာပေးတာပါ။ စာချုပ်လက် မှတ် ရေးထိုးတာကိုတော့ ဇန်န၀ါရီ ၁၇ ရက်ကအဖွဲ့ချုပ်ရုံးခန်းမှာ လုပ်ခဲ့ပါတယ်”ဟု ဦးစိုးမိုးကျော်က ဆိုသည်။
မြန်မာနိုင်ငံ ဘောလုံးအဖွဲ့ချုပ်အနေဖြင့် လာမည့်နှစ်ဘောလုံးရာသီတွင် ပြည်တွင်းပြိုင်ပွဲများအဖြစ် မြန်မာနေရှင်နယ်လိဂ်အမှတ်ပေးပြိုင်ပွဲ၊MFF Cup၊ မြန်မာနေရှင်နယ်လိဂ်လူငယ်အမှတ်ပေးပြိုင်ပွဲ၊ MNL-2 စသည့်ပြိုင်ပွဲများအပြင် အမျိုးသမီးလိဂ်ပြိုင်ပွဲကိုလည်းကျင်းပရန် စီစဉ်နေသည်။ ဘောလုံးအဖွဲ့ချုပ် အနေဖြင့် စပွန်ဆာရရှိသောငွေကြေးများကို မြန်မာနေရှင်နယ်လိဂ်ပြိုင်ပွဲကျင်းပရာ၌ ကုန်ကျစရိတ်များ ဖြစ်သော ဆုကြေး၊ ကွင်းပြင်ဆင်စရိတ်၊ ကလပ်အသင်းများ သွားလာနေထိုင်စရိတ် စသည်တို့အတွက် အသုံးပြုရပြီး လက်ရွေးစင်ဘောလုံးအသင်းများ ပြည်ပထွက်ကစားရသည့် ကုန်ကျစရိတ်များအတွက် လည်း အသုံးပြုရသည်။

Mizzima