သိန်းတစ်ထောင် သုံးစွဲခွင့် ဗမာလူမျိုးနှင့် ပြည်ခိုင်ဖြိုးပါတီအတွက်ဟု တိုင်းရင်းသား ကိုယ်စားလှယ်အချို့ဝေဖန်

ပြည်ထောင်စု လွှတ်တော်မှ မဲဆန္ဒနယ် တစ်ခုချင်း၏ ဖွံ့ဖြိုးတိုးတက်ရေးအတွက် ငွေကျပ် သိန်းတစ်ထောင်ကို သုံးစွဲခွင့်ပြုခဲ့ရာ မဲဆန္ဒနယ် အများဆုံး ရှိသည့် ဗမာလူမျိုးစု၏ ဖွံ့ဖြိုးတိုးတက်ရေးနှင့် ပြည်ခိုင်ဖြိုးပါတီ၏ ပါတီ စည်းရုံးရေးတွင်သာ ပိုမို အားကောင်း စေနိုင်သည်ဟု ဒီဇင်ဘာ ၂၆ ရက်တွင် တိုင်းရင်းသား လွှတ်တော် ကိုယ်စားလှယ်များက မြန်မာသံတော်ဆင့်သို့ ဝေဖန် ပြောကြားခဲ့ကြသည်။

သိန်းတစ်ထောင်ကို သက်ဆိုင်ရာ မဲဆန္ဒနယ်အလိုက် အမျိုးသားလွှတ်တော်၊ ပြည်သူ့လွှတ်တော်၊ တိုင်းဒေသကြီး လွှတ်တော် သို့မဟုတ် ပြည်နယ်လွှတ်တော် ကိုယ်စားလှယ် အနက်မှ သုံးဦးတို့ ဘဏ္ဍာငွေ သုံးစွဲရေး ကော်မတီ တစ်ရပ်ဖွဲ့ကာ ပူးပေါင်း သုံးစွဲရမည်ဖြစ်ပြီး လွှတ်တော် ကိုယ်စားလှယ်များက ဒေသဖွံ့ဖြိုးရေး ဆိုင်ရာ အသုံးစရိတ်များတွင် ယင်းကျပ် သိန်းတစ်ထောင် အသုံးပြုနိုင်ရန် ပြည်ထောင်စု လွှတ်တော်က ၂၀၁၃ -၂၀၁၄ ခု ဘဏ္ဍာရေးနှစ် ဒီဇင်ဘာ ၁၁ ရက်မှ စတင်သုံးစွဲခွင့် ပြုခဲ့သည်။ …

ကျပ်သိန်းတစ်ထောင် အသုံးပြုနိုင်ရန် ပြည်ထောင်စု လွှတ်တော်ဆိုင်ရာ ဥပဒေကြမ်းကို နိုင်ငံတော်သမ္မတ ဥပဒေ အတည်ဖြစ်ကြောင်း လက်မှတ်ရေးထိုးခြင်း မရှိဘဲ သဘောထား မှတ်ချက်များဖြင့် လွှတ်တော်သို့ ပြန်လည် ပေးပို့ထားသော်လည်း ပြည်ထောင်စု လွှတ်တော်မှ ဥပဒေ တစ်ရပ် အနေဖြင့် သတ်မှတ် လိုက်ပြီဆိုပါ က သတ်မှတ်သည့် နေ့မှ ၁၄ ရက် အကြာတွင် သမ္မတ လက်မှတ် မထိုးဘဲ အတည်ဟု သတ်မှတ်သည်။

မဲဆန္ဒနယ်အလိုက် ဖွဲ့စည်းထားသည့် ပြည်သူ့လွှတ်တော်တွင် လွှတ်တော် ကိုယ်စားလှယ် ၄၄၀ ဦးရှိပြီး စစ်သားပါဝင်သည့် ဦးရေ ၁၁၀ ဦး၊ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီမှ ၂၁၆ ဦး၊ အမျိုးသား ဒီမိုကရေစီ အဖွဲ့ချုပ်မှ ၃၈ ဦးတို့ အပါအ၀င် ဗမာလူမျိုးစု မဲဆန္ဒနယ်သည် ၂၇၃ ခုရှိပြီး တိုင်းရင်းသား မဲဆန္ဒနယ် များသည် ၄၇ နေရာရှိသည်။

ယင်းကဲ့သို့ ဒေသဆိုင်ရာ ဖွံ့ဖြိုးရေးတွင် အသုံးပြုနိုင်ရန် ပြည်ထောင်စု လွှတ်တော်မှ ချပေးသည့် ကျပ်သိန်း တစ်ထောင်၏ အသုံးပြုမှု၊ အကျိုးရှိမှုများအပေါ် ချင်း အမျိုးသားပါတီ ဥက္ကဋ္ဌ ပြည်သူ့လွှတ်တော် ကိုယ်စားလှယ် ဦးဇိုဇမ်က ““အဲဒါနဲ့ ပတ်သက်ပြီး ကျွန်တော်တို့က တကယ် ကျကျနန လုပ်နိုင်တဲ့ အခြေအနေပေါ် မူတည်ပြီး ပြောရမယ်။ ပြည်ခိုင်ဖြိုးအနေနဲ့ မဲဆွယ်စည်းရုံးတဲ့အခါ သုံးမှာပဲလေ။ ဒီလိုပဲ ဖြစ်သွားမှာပဲ။ သူတို့က အများစု ဆိုတဲ့ အခါကျတော့ ကြီးစိုးတဲ့ နေရာမှာ သူတို့ အာဘော်ကြီးပဲ လွှမ်းမိုးမှာပေါ့။ တကယ်တမ်း အလုပ်လုပ် ဖြစ်ပါ့မလားလို့ ကျွန်တော်တို့က စိုးရိမ်တာပေါ့။ ဗမာလူမျိုးစု များနေပေမယ့် ကျွန်တော်တို့အတွက် မရှိတာ ထက်စာရင်တော့ ကောင်းပါတယ်။ ဖွံ့ဖြိုးတဲ့ နေရာမှာ စနစ်တကျ လုပ်ဖို့ စိုးရိမ်တာက ဒီပိုက်ဆံတွေကို စီမံ ခန့်ခွဲမှု လုပ်တဲ့နေရာကို စိုးရိမ်မိတာပါ””ဟု ပြောသည်။

ကျပ်သိန်းတစ်ထောင် သုံးစွဲခွင့် ပေးခြင်းအပေါ် ““လွှတ်တော် ကိုယ်စားလှယ် အားလုံးပေါင်းက ၃၃၀ ရှိတယ်။ ကျွန်တော်တို့က ၄၀ ကျော်လောက်ပဲ ပါဝင်တယ်။ ကြံ့ခိုင်ရေးက ၂၀၀ ကျော်လောက် ဖြစ်နေတော့ များတယ်လို့ ပြောလို့ရတာပေါ့။ ခုသိန်းတစ်ထောင်က လွှတ်တော်က ဘတ်ဂျက်နဲ့ ပေးတာပါ။ ဒါကို ပါတီ တစ်ခုရဲ့ ပါတီစည်းရုံးရေး၊ ပါတီစည်းရုံးရေး ဆောင်ရွက်မှုကို ရှေးရှုပြီး ပေးမယ်ဆိုရင် သူ့ပါတီအတွက်လည်း အလားအလာကောင်း ဖြစ်လာမှာ မဟုတ်ပါဘူး။ ဒါဟာ တန်ပြန်မှုတွေ ရှိလာနိုင်ပါတယ်”” ဟုအမျိုးသား ဒီမိုကရေစီ အဖွဲ့ချုပ်မှ လှည်းကူးမြို့နယ်၊ ပြည်သူ့လွှတ်တော် ကိုယ်စားလှယ် ဦးဖြိုးမင်းသိန်းက သုံးသပ်ခဲ့သည်။

ပြည်သူ့လွှတ်တော် ကိုယ်စားလှယ်များအား သိန်းတစ်ထောင် ချပေးခြင်းနှင့် စပ်လျဉ်း၍ လွှတ်တော် ကိုယ်စားလှယ်များသည် ပြည်သူကို ဗဟိုပြုကာ လုပ်ကိုင်ရန် လိုအပ်ပြီး ယင်းကိစ္စအား အခွင့်အရေးယူကာ အလွဲသုံးစားမှုများ ပြုလုပ်လျှင် ညွှန်ကြားချက်နှင့် တလွဲစီ ဖြစ်သွားနိုင်ကာ ပြည်သူလူထု၏ လိုလားချက် များအား အမှန်တကယ် ပံ့ပိုးကူညီနိုင်လျှင် သိန်းသန်းပေါင်းများစွာ အကုန်အကျခံကာ ပြုလုပ်မှုအား သေသေ ချာချာ တင်ပြနိုင်ခြင်း မရှိသော နိုင်ငံတော် စီမံကိန်းများကို နမူနာ ပြနိုင်မည် ဖြစ်ကြောင်း ရခိုင် အမျိုးသား ဖွံ့ဖြိုး တိုးတက်ရေး ပါတီဥက္ကဋ္ဌ ပြည်သူ့လွှတ်တော် ကိုယ်စားလှယ် ဒေါက်တာ အေးမောင်က ပြောသည်။

ဒေါက်တာအေးမောင်က““လွှတ်တော် အမတ်တွေပါတဲ့ အကောင်အထည်ဖော်ရေး အဖွဲ့က အကောင်အထည် ဖော်ရေး အဖွဲ့အနေနဲ့ ရှိတာပေါ့နော်။ အဲဒီတော့ ဒီအဖွဲ့က ငွေကြေးကို ကိုင်သုံးစွဲတာ မဟုတ်ပေမယ့် ပါဝင်တဲ့ မြို့နယ် ဖွံ့ဖြိုးရေးနဲ့ ပတ်သက်လို့ အထောက်အကူပြု ကော်မတီရဲ့ အဆိုပြုချက်တွေက ဘယ်ဟာကို ဦးစား ပေးရမယ်၊ ဘယ်ဟာကို ဦးစား မပေးရဘူးဆိုတဲ့ စီမံခန့်ခွဲတဲ့ အပိုင်းလည်း လုပ်ရတာပေါ့နော်။ တကယ်လို့များ သိန်းတစ်ထောင်၊ သိန်းနှစ်ထောင်၊ သိန်းသုံးထောင် စသည်ဖြင့် မြို့နယ် ဖွံ့ဖြိုးရေး လုပ်ငန်းတွေကို လွှတ်တော်က စီမံခန့်ခွဲပိုင်ခွင့် ရှိတယ်ဆိုရင် လုပ်ရမှာ တစ်ခုပဲရှိတယ်။ အဲဒါက ပြည်သူဗဟိုပြုတဲ့ စီမံခန့်ခွဲမှု ဖြစ်အောင် မြို့နယ် အထောက်အကူပြု ကော်မတီမှာ တကယ်စစ်မှန်တဲ့ ပြည်သူလူထု လိုလားတဲ့ ပုဂ္ဂိုလ်တွေ ပါဝင်ဖို့လိုတယ်။ အဲလိုပုဂ္ဂိုလ်တွေ ပါဝင်ရင် ကြံ့ခိုင်ရေးကြောင့် ဘာညာ မရှိတော့ဘူး။ မြို့နယ်ကို စီမံခန့်ခွဲမယ့် ဖွံ့ဖြိုးရေး လုပ်ငန်းနဲ့ ပတ်သက်လို့ အထောက်အကူပြုမယ့် ကော်မတီဟာ ပြည်သူဗဟို ပြုဖို့လိုတယ်။ အဲလိုပဲ အဆင့်ဆင့်သော ကျေးရွာအုပ်စုတို့၊ ရပ်ကွက်တို့မှာရှိတဲ့ အထောက်အကူပြု ကော်မတီဟာ ပြည်သူကို ဗဟိုပြုဖို့ လိုတယ်။ အဲသလိုဆိုရင် သူတို့တင်ပြတဲ့ အသေးစား လုပ်ငန်းတွေက ပြည်ထောင်စု အစိုးရရဲ့ ဘတ်ဂျက် မှာလည်း မပါဘူး။ တိုင်းဒေသကြီး ဘတ်ဂျက်မှာလည်း မပါဘူး။ စသည်ဖြင့် လူထုလိုလားတဲ့ အချက်တွေကို လူထုဗဟိုပြုတဲ့ ကော်မတီက တိကျတဲ့ အချက်ကို လွှတ်တော်ဘက်က ပါဝင်တဲ့ အကောင်ထည်ဖော်ရေး အဖွဲ့က စီမံခန့်ခွဲ ကြီးကြပ်ပေးရတာပေါ့နော်။ လွှတ်တော်နဲ့တော့ ဘာမှမဆိုင်ဘူး။ လွှတ်တော် ကိုယ်စားလှယ်တွေနဲ့ သိပ်ပြီး ငွေရေးကြေးရေးပိုင်းက ပတ်သက်မှု မရှိဘူးလို့ပဲ ပြောရမယ်။ ဒါနဲ့ ဒါကြီးကို အခွင့်အရေးယူပြီး လွှတ်တော် အမတ်တွေက ကိုယ်တိုင် အကောင်အထည် ဖော်ရင်တော့ဖြင့် ညွှန်ကြားချက်နဲ့ တလွဲစီ ဖြစ်သွားနိုင်တာပေါ့။

လာမယ့် ၂၀၁၄ မတ်လ ၃၁ ရက်နေ့ ကာလမှာ ဒီကော်မတီဟာ ဒီသိန်းတစ်ထောင်နဲ့ ပတ်သက်လို့ လွှတ်တော်က ၀င်မယ်။ အဲဒီတော့ စစ်မှန်မှုရှိ၊ မရှိကို လူထုက ပြန်သုံးသပ်ဖို့ လိုတယ်။ ဖြစ်နိုင်ရင် ၂၀၁၄၊ ဧပြီလကစတဲ့ ဘတ်ဂျက်တွေဟာ တကယ်စစ်မှန်တဲ့ မြို့နယ် ဖွံ့ဖြိုးတိုးတက်မှုနဲ့ ပတ်သက်တဲ့ အထောက် အကူပြု အစစ်အမှန်ကို ကျွန်တော်တို့လိုချင်တယ်။ မြို့နယ် စည်ပင်သာယာနဲ့ ပတ်သက်တဲ့ ကော်မတီကို တကယ် အစစ်အမှန် လုပ်နေတဲ့ ကော်မတီကို ကျွန်တော်တို့ လိုချင်တယ်။ ဟိုအဆောင် အယောင်တွေ၊ အဆွယ်အပွားတွေပါတဲ့ ကော်မတီ မဖြစ်စေချင်တော့ဘူး။

အစိုးရလုပ်တဲ့ လုပ်ငန်းတွေဟာ ကျွန်တော်တို့ အခုထိ ပွင့်လင်းတယ်ဆိုတာ မရှိဘူး။ အဲတော့ ပြည်ထောင်စု လွှတ်တော်က ဒီလိုဘတ်ဂျက်ဟာ တကယ်ပွင့်လင်း မြင်သာတယ်ဆို လူထုကလည်း ယူစစ်နိုင်တယ်။ သူတို့ သိအောင်လည်း ထင်သာမြင်သာ ဆိုင်းဘုတ် ကပ်ထားတယ်။ ဒီလိုလုပ်တဲ့ လုပ်ငန်းတွေ အပေါ်မှာလည်း သေသေချာချာ လုပ်ငန်းရဲ့ စာရင်းဇယားကို စစ်မှန်တဲ့အဖွဲ့က လူထုပါတယ်ဆိုရင် သိန်းတစ်ထောင်ဆိုတဲ့ အင်မတန် သေးငယ်တဲ့ ဥစ္စာလေးကို ဒီလို လုပ်လို့ရပြီဆိုရင် သိန်းသန်းပေါင်းများစွာ လုပ်နေတဲ့ ပြည်ထောင်စု ဘတ်ဂျက်တွေကို ပြန်သုံးသပ်ဖို့ လိုတယ်။ စီမံကိန်းကြီးကို အခုထိ ဘာမှန်းမသိ၊ ညာမှန်းမသိ သုံးနေကြတယ်။ ဘယ်လိုမှလည်း မပြသေးဘူး။ ဒါတွေကို ထောက်ပြပြီး ခင်ဗျားတို့ဘက်က လွှတ်တော် ကိုယ်စားလှယ်တွေရတဲ့ သိန်းတစ်ထောင်က ဘယ်လောက်ထိ ပွင့်လင်း မြင်သာမှု ရှိလဲ၊ ထိရောက်မှု ရှိလဲလို့ သုံးသပ်မယ်ဆိုရင် သိန်းပေါင်း၊ သန်းပေါင်း များစွာရတဲ့ အကျိုးကျေးဇူးတွေကို လက်တွေ့ ထုတ်ရတော့မယ်။ လမ်းတွေ၊ အဆောက်အအုံကြီးတွေ၊ လျှပ်စစ်ဓာတ်အား ပေးတဲ့ဟာတွေ၊ ဒါတွေကို ခင်ဗျားတို့ ထောက်ပြမယ်ဆိုရင် အစိုးရရဲ့ လုပ်ငန်းဟာ ပြည့်သွားနိုင်တယ်။ ခင်ဗျားတို့ဘက်က နမူနာပြတဲ့ဟာ လုပ်ပေးကြပါ””ဟု ပြောသည်။

ဦးဖြိုးမင်းသိန်း (NLD ပြည်သူ့လွှတ်တော် ကိုယ်စားလှယ်) ကလည်း ““ဒီအခြေအနေနဲ့ ပြောရမယ်ဆိုရင် ပါတီရဲ့ လွှတ်တော် ကိုယ်စားလှယ် အရေအတွက်နဲ့ ယှဉ်ပြီး ပြောမယ်ဆိုရင်တော့ ခုနကပြောတဲ့ ပြည်သူလူထုတွေ ကြားမှာ ပြောနေတဲ့ အရာက မှန်ပါတယ်။ လွှတ်တော် ကိုယ်စားလှယ်များတဲ့ လူတွေက ၃၃၀ ရှိနေတယ်။ ကျွန်တော်တို့က ၄၀ ကျော် လောက်မှာပဲ ပါဝင်တဲ့အတွက် နည်းနေတာပေါ့။ ၂၀၀ ကျော်လောက်က ကြံ့ခိုင်ရေးက ချည်းပဲ ဖြစ်နေတာပေါ့လေ။ ဒီအခြေအနေ အပေါ်မှာရရှိတဲ့ ပမာဏက လွှတ်တော်ကိုယ်စား လှယ် အချိုးအစားနဲ့ ကြည့်မယ်ဆို မှန်ပါတယ်။ ကြံ့ခိုင်ရေးဘက်က များတယ်လို့ ပြောလို့ရပါတယ်။ ဒါပေမဲ့ အခုပေးလိုက်တဲ့ ပိုက်ဆံ သိန်းတစ်ထောင်က ဒီပြည်ထောင်စု လွှတ်တော်က ဘတ်ဂျက်က ပေးတာပါ။ ပြည်ထောင်စု လွှတ်တော်ရဲ့ ဘတ်ဂျက်ပဲ။ ဒီလူတွေကို ပါတီတစ်ခုရဲ့ ပါတီစည်းရုံးရေး၊ ပါတီစည်းရုံးရေး ဆောင်ရွက်မှုကို ရှေးရှုပြီး ပေးမယ်ဆို သူ့ပါတီအတွက် အလားအလာကောင်း ဖြစ်လာမှာ မဟုတ်ပါဘူး။

မှန်မှန်ကန်ကန် ဆောင်ရွက်နိုင်တဲ့ သူဆိုရင် ဒီပိုက်ဆံ သိန်းတစ်ထောင်က လွှတ်တော် ကိုယ်စားလှယ်တွေ ကြားထဲမှာ ပြဿနာ မပေါ်ပေါက်ဘူး။ ပြည်သူလူထုက မယုံမကြည်ဖြစ်ပြီး ပါတီတစ်ခုရဲ့ လက်နက် အသုံးပြုတဲ့ ပုံသဏ္ဌာန် ဖြစ်လာရင်သာ လွှတ်တော် ကိုယ်စားလှယ်တွေ ကြားမှာ ပြဿနာ ပေါ်ပေါက်မှာပါ”” ဟု မြန်မာသံ တော်ဆင့်သို့ ပြောသည်။

ဒေါက်တာညိုညိုသင်း (ရန်ကုန်တိုင်း လွှတ်တော်ကိုယ်စားလှယ်) က ““အန်တီ့ အနေနဲ့ကတော့ လွှတ်တော်ကိုယ်စား လှယ်တွေက ပြည်သူတွေကို  နားလည် အောင်ရှင်းပြရမှာပေ့ါ။ ဒါဟာ ပါတီရဲ့ပိုက် ဆံမဟုတ်ဘူး။ ပါတီရဲ့လုပ်ငန်း မဟုတ် ဘူး။ သက်ဆိုင်ရာလွှတ်တော် ကိုယ်စား လှယ်တွေက နားလည်အောင် ရှင်းပြရမယ် ဆိုလို့ရှိရင် ဒီလိုအထင်လွဲမှား မှုတွေလည်း ပျောက်သွားမှာပေ့ါလေ။ အဓိကအရေးကြီး တာတော့ တကယ်ပြည်သူ့ဖွံ့ဖြိုးရေး ရန်ပုံ ငွေဖြစ်တဲ့အတွက်ကြောင့် လွှတ်တော် ကိုယ်စားလှယ်တွေကို မေးတာမှန်သော် လည်းပဲ ဒါပြည်သူလူထုရဲ့ ငွေဖြစ်တဲ့ အတွက်ကြောင့်မို့လို့ မိမိပါတီအတွက် အာဏာရရေးအတွက် ကောင်းစားရေး အတွက် ဒီငွေကို အသုံးချတာမဟုတ်ဘဲ နဲ့ ပြည်သူလူထုရဲ့ အကျိုးစီးပွားအတွက် စစ်မှန်စွာ၊ မှန်ကန်စွာ ပွင့်ပွင့်လင်းလင်း မြင်မြင်သာသာ ဆောင်ရွက်မယ်ဆိုလို့ရှိ ရင်တော့ ဒီနားလည်မှု အထင်မြင်လွဲမှား မှုတွေလည်း မကြာခင်ပျောက်သွားမယ်လို့ အန်တီထင်ပါတယ်”” ဟုပြောသည်။

ဒေါက်တာမေ၀င်းမြင့် (ပြည်သူ့လွှတ်တော်ကိုယ်စားလှယ်)က ““အမျိုးသား လွှတ်တော်ကိုယ်စားလှယ်၊ ပြည်သူ့ လွှတ်တော်ကိုယ်စားလှယ်၊ တိုင်းဒေသကြီး လွှတ်တော် ကိုယ်စားလှယ်တွေ ပေါင်းပြီးတော့ ဦးဆောင် လုပ်တာပေါ့နော်။ အမျိုးသားကတော့ ဥက္ကဋ္ဌနေရာ တာဝန်ယူတာပေ့ါနော်။ အမျိုးသား လွှတ်တော် နာယကပေ့ါ။ တိုင်းဒေသကြီး နှစ်ယောက်ကတော့ ဒုဥက္ကဋ္ဌနဲ့ အတွင်းရေးမှူးပေ့ါနော်။ ဖော်ဆောင်ရေး အဖွဲ့ကတော့ မြို့နယ်မှာရှိတဲ့ ဖွံ့ဖြိုးတိုးတက်ရေးအဖွဲ့ခေါ်ပြီးတော့ တာဝန်ခံပြီး လုပ်ရမှာ ဆိုတော့လေ။ အန်တီတို့မြို့နယ် ကတော့ သိန်းတစ်ထောင်ကို ရပ်ကွက် အကြီး၊ အသေး၊ အလတ်သုံးခု ခွဲလိုက်ပြီးတော့ ရပ်ကွက်လည်း ကျယ်တယ်။ လူဦးရေလည်း များတယ် ဆိုတဲ့ ရပ်ကွက်ကို သိန်း ၁၅၀ လျာထားတယ်။ နောက်တော့ ရပ်ကွက်အလတ်ပေ့ါ။ ၆ နဲ့ ၈ အဲဒါ ကတော့ သိန်းတစ်ရာ သတ်မှတ်ပြီးတော့ အန်တီတို့ ကမ္ဘာအေးလိုပေါ့။ ဘုရားရှေ့ ရပ်ကွက်ကျတော့ သိန်း ၅၀။ တချို့ရပ်ကွက် ကတော့ သိန်းတစ်ထောင်အထိ အဲဒီလို ခွဲလိုက်တယ်။ အန်တီတို့မှာ လုပ်ပေးတဲ့ ဖော်ဆောင်ရေး ကော်မတီက လူတွေ အားလုံးက ၅၀ ရာခိုင်နှုန်း ရုံးသုံးစရိတ်သုံးနိုင် တယ်ဆိုပေမယ့် အန်တီတို့က မယူတော့ဘူး”” ဟု ကျပ်သိန်းတစ်ထောင် သုံးစွဲမှုနှင့် ပတ်သက်၍ ရှင်းလင်း ပြောပြသည်။

ဒေါ်ဖြူဖြူသင်း (မင်္ဂလာတောင်ညွှန့် ပြည်သူ့လွှတ်တော်ကိုယ်စားလှယ်)က““ သုံးစွဲဖို့အတွက် ရပ်ကွက်တွေနဲ့ ညှိနှိုင်းပြီးတော့ ရပ်ကွက်တွေက လိုအပ်ချက်တွေကို တင်ထားတဲ့ Project တွေရှိတယ်။ အဲဒီ Project တွေကို ကြည့်ပြီးတော့ လွှတ်တော်ကိုတော့ တင်ထားပြီးပြီ။ လွှတ်တော်က မချသေးဘူး။ အဓိက သတ်မှတ်ထားတဲ့ ပညာရေး ကျန်းမာရေးတွေနဲ့ နောက်အခြားသူတို့ရဲ့ သတ်မှတ်ထားတဲ့ Project တွေထဲမှာမှ ပြည်သူ လူထုရဲ့ လိုအပ်ချက်နဲ့ ပေါင်းပြီးတော့ တင်ထားပါတယ်။  Project လုပ်တဲ့အခါမှာ ပြည်သူတွေတကယ်ကို  လိုအပ် တာနဲ့ အနီးစပ်ဆုံးဖြစ်တာ၊ လွှတ်တော်ချ ပေးဖို့ပြောတာတွေ ချပေးတာပါ”” ဟု ပြောသည်။

ဦးသိန်းညွှန့် (သင်္ဃန်းကျွန်းမြို့နယ် ပြည်သူ့လွှတ်တော်ကိုယ်စားလှယ်) က သိန်းတစ်ထောင် သုံးစွဲခြင်းနှင့် ပတ်သက်၍ ““ကျွန်တော်တို့က လွှတ်တော်ထဲမှာ ပြဋ္ဌာန်းထားတဲ့အတိုင်း ဖွံ့ဖြိုးရေး ရန်ပုံငွေ သိန်းတစ် ထောင်ကို သုံးတဲ့နေရာမှာ ပြည်သူလူထုနဲ့ တိုက်ရိုက် သက်ဆိုင်ရာ ဒေသခံတွေနဲ့ တိုက်ရိုက် ညှိနှိုင်းပြီး လုပ်ဆောင်တယ်။ ပြည်ထောင်စု လွှတ်တော်မှာပါတဲ့ လုပ်ထုံး လုပ်နည်းအတိုင်း ရေ၊ လမ်း၊ ပညာရေး၊ အဆောက်အအုံ ပြုပြင်ရေး၊ ကျန်းမာရေး၊ ပြည်သူလူထု အမှန်တကယ် လိုအပ်ချက် လုပ်ငန်းများကို လုပ်နိုင်ဖို့ အတွက် သက်ဆိုင်ရာ ရပ်ကွက်ရဲ့ လူထုသဘောထား၊ ဆန္ဒ၊ ရပ်ကွက် အုပ်ချုပ်ရေးအဖွဲ့တွေရဲ့ တင်ပြချက် အားလုံးကို စုပြီးတော့ လုပ်ငန်းအားလုံးကို ဒီဇင်ဘာ ၂၂ မှာ ကျွန်တော်တို့ သတ်မှတ်ပြီးပြီ။ အဲဒီနေ့မှာ လွှတ် တော် ကိုယ်စားလှယ်တွေမှာ ပါတဲ့သူတွေက ဘယ်လုပ်ငန်း ဘယ်လုပ်ငန်းလဲ ဆိုတာ ဆုံးဖြတ်ပြီးသွားပြီ”” ဟု မြန်မာသံတော်ဆင့်သို့ ပြောကြားခဲ့သည်။

by myanmar thandawsint